لاہور۔28ستمبر(اے پی پی) وفاقی وزیر تعلیم مدد علی سندھی آکھیے نگران حکومت تعلیمی شعبے دی بہتری سانڳے اقدامات کریندی پئی اے ، گورنمنٹ کالج یونیورسٹی ھک تاریخی تعلیمی ادارہ اے ،سرکاری سکولاں دے معیار تے سہولتاں ودھاوݨ سانڳے کوششاں کریندے پیوں ۔ اے ڳالھ انہاں گورنمنٹ کالج یونیورسٹی دے22 ویں سالانہ کانوو کیشن توں خطاب اچ آکھی اے ۔ ایں موقع تے وائس چانسلر جی سی یونیورسٹی پروفیسر ڈاکٹر اصغر علی زیدی ، سابق چیف جسٹس آف پاکستان تصدق حسین جیلانی ، بحرین دی پارلیمینٹ دے ڈپٹی سپیکر ڈاکٹر عادل بن عبد الرحمان ، قاری صہیب احمد اتے نعیم طاہر سودھے فیکلٹی ممبران ، طابیں تے انہاں دے ما پیو شرکت کیتی ۔ نگران وفاقی وزیر تعلیم آکھیے گورنمنٹ کالج ملک اچ اعلی تعلیم ݙیوݨ اچ اہم کردار ادا کیتے ، علامہ اقبال دی مادر علمی اچ بطور مہمان خصوصی شرکت کرݨ میں کیتے وݙے اعزاز دی ڳالھ اے ۔ انہاں آکھیے او جݙاں وی لاہور آندے ویندے ہن تاں گورنمنٹ کالج کوں ٻاہروں ݙیکھدے رہندے ہن ، اڄ جݙاں میں ایں تاریخی تعلیمی ادارے اچ داخل تھیا تاں ایندیاں دیواراں تے کھڑکیاں ݙیکھ تے ٻہوں خوشی تھئی ۔ انہاں دا آکھݨ ہا جو گورنمنٹ کالج ھک ایجھا ادارہ اے جیں دی ݙڈھ سو سال بعد وی چنڳی حالات اچ ہے ، اتھوں کئی نامور شخصیات تعلیم گھن تے ملک تے ٻاہرلے ملک آپݨی خدمات انجام ݙیندے پئن تے کئی نامور شخصیات اتھوں تعلیم گھن تے نہ صرف اپݨی صلاحیتاں کوں منوائے بلکہ پاکستان دا ناں وی روشن کیتے ۔ انہاں آکھیے عوامی نمائندے اسمبلیاں اچ ٻہہ تے عوام دے حقوق دا تحفظ کریندن ، مستقبل دے چیلنج نال نبݨݨ کیتے تعلیمی شعبے کوں کلیدی کردار ادا کرݨا ہوسی ۔ وفاقی وزیر آکھیے 28 توں 30 ملین ٻال حالی سکولاں توں ٻہر ہن ،چائلڈ لیبر ٻالاں دی تعلیم دے رستے اچ وݙی رکاوٹ اے۔ انہاں آکھیے نگران حکومت تھوڑے عرصے کیتے آئی اے ،کوشش کریسوں جو تعلیم دے شعبے اچ ایہو سویں اقدامات کروں جیڑھے قابل تقلید ہوون وزیر تعلیم آکھیے میں بنیادی طور تے قلم کار ہاں ، میکوں پتہ اے جو قوم دے مسئلے کیا ہن ۔کانووکیشن اچ 1210 طالبیں تے طالبات کوں ڈگریاں اتے میڈل ونڈیے ، 15 طالب تے طالبات کوں پی ایچ ڈی دی ، 152 کوں ایم فل ، 159 کوں ایم ایس سی اتے 884 کوں بی ایس دی ڈگریاں نال نوازا ڳیا۔انہاں طالبیں تے طالبا ت کوں باٹنی ، بائیو کیمسٹری ، اردو ، ایجوکیشنل سائیکالوجی، ذوالوجی ، اپلائیڈ فزکس ، انوائرمنٹل سائنس ، کمپیوٹر سائنس ، فلاسفی ، انگلش ، پولیٹیکل سائنس ، ریاضی ، اسلامیات، فارسی اتے پنجابی سودھے ٻئے مضمون اچ ڈگریاں ݙتیاں ڳئن ۔ایں موقع تے طالبعلم نعیم طاہر کوں لائف ٹائم اچیومنٹ ایوارڈ نال نوازا ڳیا۔تقریب توں ٻئے شرکا وی خطاب کیتا ۔
