اسلام آباد۔10فروری(اے پی پی):وفاقی وزیرخزانہ ومحصولات سینیٹرمحمداسحاق ڈارآکھیے آئی ایم ایف مشن دے نال ڳالھ مہاڑ مکمل تھی چکی اے ، حکومت آئی ایم ایف پروگرام دے نفاذ اچ پرعزم اے، 170 ارب روپے دے نویں ٹیکس لاتے ویسن ، توانائی دے شعبہ اچ اصلاحات تےعمل درآمد تھیسی ، گیس تے توانائی دے شعبہ اچ گردشی قرضہ اچ مزید ودھارا نہ کیتا ویسی ، غیرہدفی زرتلافیاں ختم کیتیاں ویسن ، بے نظیرانکم سپورٹ پروگرام دے بجٹ اچ 30 جون تئیں 40 ارب روپے دا ودھارا کیتا ویسی ، پیٹرولئیم مصنوعات تے سیلزٹیکس دا اطلاق نہ تھیسی ۔جمعہ کوں اتھاں آئی ایم ایف مشن دے دورہ پاکستان دے اختتام تے میڈیا کوں بریفنگ ݙیندے ہوئیں وزیرخزانہ آکھیے پی ٹی آئی دی سابق حکومت آئی ایم ایف نال پروگرام داآغاز کیتا ہئی تے موجودہ حکومت سخت عزم دے نال ایں کوں گھن تے اڳوں ویندی پئی اے ، مخلوط حکومت ایں پروگرام دے نفاذ اچ پرعزم اے کیوں جو اے معاہدہ پاکستان دی حکومت کیتا ہئی ۔ وزیرخزانہ آکھیے پاکستان اتے آئی ایم ایف دے درمیان 10 ݙینھ اچ تھیوݨ آلی ڳالھ مہاڑ اچ بجلی، مالیات، توانائی سودھے مختلف شعبیں دا احاطہ کیتا ڳئے ،مذاکرات اچ پیٹرولیم ڈویژن، ایف بی آر، پاورڈویژن سودھے متعلقہ شعبہ جات دے نمائندے شامل ہن جیں ڳالھ مہاڑ دے نکات کوں حتمی شکل ݙتی۔
